O BNG solicita a mellora do subministro eléctrico en Antas
Antas, 5 de marzo de 2010: O BNG de Antas pide nunha moción que a Alcaldía inste á Xunta de Galicia a que se interese pola falta de iniciativas para a mellora da rede eléctrica en Antas por parte da Empresa subministradora FENOSA-GAS NATURAL. E que “o Concello solicite das autoridades competentes, unha planificación para que o subministro enerxético sexa adecuado a demanda enerxética da veciñanza, así como das explotacións agrícolas e gandeiras e industriais de Antas”.
Aos nacionalistas preocúpalles que “en varios lugares do Concello como San Fiz, se manteña o mesmo tendido que hai máis de medio século pese ao aumento do consumo derivado do incremento de aparellos eléctricos tanto de uso doméstico como aqueloutros imprescindibles para o desenrolo das actividades propias da industria agrogandeira”.
Un alcalde que permite impasible que en puntos do Concello se sufran a cotío caídas de tensión ata o apagado do alumeado doméstico só amosa desidia e pasotismo ante as necesidades da veciñanzaDenuncia o BNG que “desde a resolución do 8 de maio de 2008, da Delegación Provincial de Lugo da Consellería de Industria, pola que se autoriza e se aproba a instalación eléctrica liña de media tensión, centro de transformación e rede de baixa tensión en San Mamede-Agüela no concello de Antas de Ulla. (Expediente 011/2006 A.T.) A Xunta de Galiza non executou máis investimentos na rede eléctrica”.
O portavoz Xabier Doval denuncia a pasividade de Javier Varela “xa que un alcalde que permite impasible que en puntos do Concello se sufran a cotío caídas de tensión ata o apagado do alumeado doméstico como acontece en lugares como Santa Cristina, que paradoxicamente conta na súa Parroquia cun Parque Eólico, só amosa desidia e pasotismo ante as necesidades da veciñanza”.
