Novas BNG Concello A Pobra do Caramiñal

O BNG denuncia que o lavadoiro da Banda fai máis dun ano que non funciona.

Thu, 24 Mar 2011 20:33:23 GMT

24 de marzo de 2011.- Unha vez máis veciños e veciñas da parroquia de Santa Cruz neste caso, dirixíronse ao BNG para tratar de atopar solución a unha situación de abandono causada polo desleixo do actual goberno do PP. Os concellais Xosé Manuel Casal e Xosé Lois Piñeiro explicaron diante dos medios de comunicación o estado no que se atopa este rincón de singular beleza e as consecuencias que ten para as persoas usuarias deste lavadoiro. De novo tratase dunha actuación que require un esforzo mínimo por parte do concello, tanto económico como de persoal, pero a deixadez do Partido Popular fai que unha vez máis a veciñanza recurra ao BNG.

O BNG reclama o necesario mantemento dos parques infantís do concello.

Fri, 18 Mar 2011 19:03:42 GMT

18 de marzo do 2011.- Hoxe estiveron os concelleiros Xosé Manuel Casal e Xosé Lois Piñeiro, acompañados por Ana Rosa López, membro da asemblea local do BNG e que forma parte da candidatura ás eleccións municipais, no parque infantil de Venecia, denunciando a situación de abandono na que se atopa, co risco que isto supón para a integridade dos nenos e nenas que o empregan habitualmente.

Presentación da candidatura do BNG ás eleccións municipais

Thu, 17 Feb 2011 23:50:27 GMT

17 de febreiro de 2011.- Este sábado 19 de febreiro terá lugar o Acto Público de Presentación da Candidatura do BNG ás eleccións municipais, será ás 21:00 horas no restaurante O Lagar. O BNG propón como candidata á alcaldía da Pobra a Rosana Pérez Fernández, actual portavoz municipal e deputada provincial. Contaremos coa presenza de Guillerme Vázquez, portavoz nacional do BNG.

O BNG reclama o inmediato arranxo dunha varanda no lugar da Crocha

Fri, 11 Feb 2011 11:53:31 GMT

10 de febreiro do 2011.- Hoxe a responsábel local do BNG da Pobra e concelleira, Cristina Andrade, acompañada polo tamén concelleiro Xosé Lois Piñeiro desprazáronse ata o lugar da Crocha, onde convocaron unha rolda de prensa co obxectivo de denunciar a desidia do goberno municipal á hora de arranxar unha varanda. Trátase dunha obra mínima, pero as veciñas e veciños tiveron que recurrir unha vez máis ao BNG para solucionar os seus problemas.

Rosana Pérez solicitou o cambio de data do pleno para contribuir a facilitar o exercicio da folga o vindeiro día 27

Fri, 21 Jan 2011 11:53:17 GMT

20 de xaneiro de 2011.- O vindeiro 27 de xaneiro está convocada unha folga xeral en contra da reforma das pensións. Rosana Pérez, a nosa portavoz municipal ven de presentar un escrito no concello solicitando o cambio de data do mesmo para contribuír a facilitar o exercicio da folga a todos e todas aquelas que a queiran secundar. O BNG insta a secundar a folga e a participar activamente nas manifestacións convocadas pola CIG en todas as cidades do País.

O BNG convocou unha rolda de prensa para valorar a nova páxina web municipal.

Thu, 20 Jan 2011 10:45:15 GMT

19 de xaneiro de 2011.- A responsábel local do BNG e concelleira, Cristina Andrade, acompañada polos concelleiros Xosé Manuel Casal e Xosé Lois Piñeiro, dou unha rolda de prensa na que explicou a posición do BNG ao respecto da nova páxina web do concello. Calificou de escándalo o uso partidista que o PP lle está a dar entrando a criticar abertamente un voceiro do BNG. Tamén valorou negativamente a non existencia da páxina de espazos para a participación cidadá (foro, libro de visitas, etc.).

A Deputación da Coruña destina 340.000 euros para a construción dun campo de fútbol de herba artificial en Cadreche

Fri, 14 Jan 2011 19:50:29 GMT

14 de xaneiro de 2011.- As xestións de Rosana Pérez, deputada provincial e portavoz do BNG no concello da Pobra, permitiron que no mes de decembro pasado o vicepresidente da Deputación, Pablo Villamar suscribira co concello da Pobra un convenio para financiar a construción dun campo de fútbol con vestiarios no lugar de Cadreche. A Deputación destinará para esta nova infraestrutura deportiva un orzamento de 340.000 euros, que representan o 43,76% do importe total do proxecto, que ascende a 776.950 euros.

O BNG demanda a retirada da actual proposta de reforma das pensións de xubilación

Thu, 11 Mar 2010 13:00:54 GMT

4 de marzo de 2010.- O BNG dou a coñecer nunha rolda de prensa unha moción que o concellal Xosé Manuel Casal Sabín presentou para a súa inclusión no pleno do 25 de febreiro, sobre a proposta de reforma das pensións de xubilación do goberno do estado. Estivo arroupado pola portavoz municipal Rosana Pérez, e pola concelleira Amparo Cerecedo e o concelleiro Xosé Lois Piñeiro. Na moción o BNG amósase contrario a ampliación da idade de xubilación dos 65 aos 67 anos. Trátase dunha medida errada, polo cal solicitamos que o concello inste á Xunta a que se dirixa ao Goberno Central para que retire esta proposta. Rosana Pérez fixo referencia ás políticas alternativas que o BNG reclama para facer fronte á crise.

Reunión veciñal en Santa Cruz

Thu, 11 Mar 2010 12:49:37 GMT

25 de febreiro de 2010.- A portavoz do BNG Rosana Pérez Fernández, os concelleiros Severino Romero, Xosé Manuel Casal Sabín e Xosé Lois Piñeiro García, xunto co viceresponsábel local, Xesús Vilasó, que presentou o acto, así como outros membros da Asemblea Local, desprazáronse o xoves 25 de febreiro ata a escola da Granxa, en Santa Cruz, onde mantiveron unha reunión cos veciños e veciñas da zona. A nosa portavoz informou das iniciativas que temos levado a cabo en relación coa parroquia. A continuación escoitamos as inquedanzas da veciñanza referentes ao goberno municipal, as principais foron a problemática da ampliación do cemiterio da parroquia, a posibilidade de cubrir a pista deportiva e construir un centro social a carón da escola, a rede viaria e o saneamento.

O deputado Fernando Branco explicou a postura do BNG sobre a fusión das caixas.

Tue, 02 Mar 2010 15:34:57 GMT

19 de febreiro de 2010.- Fernando Branco, deputado do BNG no Parlamento Galego, responsábel da área de Economía, Facenda e Orzamentos, estivo no local do ISM para explicar porque o BNG apoia a fusión das duas caixas máis importantes do país. Entre outras cuestións, afirmou que é preciso que o centro de decisión de como se invirten os aforros dos galegos e galegas permaneza en Galiza e non noutras partes do estado. Estivo acompañado pola responsábel comarcal Dores Torrado e pola portavoz do BNG Rosana Pérez Fernández.

Unha nova iniciativa a prol de mellorar á atención aos centros educativos

Tue, 02 Mar 2010 15:27:59 GMT

A Pobra, 9 de febreiro de 2010.- A concelleira do BNG Cristina Andrade presentou unha moción ao pleno de xaneiro de 2010 sobre a situación dos centros educativos do noso municipio. O escrito reclama unha maior atención no coidado e mantemento das escolas de infantil e primaria. O PP votou en contra desta iniciativa respaldada pola opinión da comunidade educativa do noso concello.

As propostas do BNG para incluir no Fondo Estatal para o Emprego e a Sostibilidade Local (FEES)

Tue, 10 Nov 2009 20:40:15 GMT

6 de novembro de 2009.- A nosa portavoz Rosana Pérez Fernández ven de presentar no concello un escrito onde solicita que se inclúan no Fondo Estatal para o Emprego e a Sostibilidade Local unha serie de inversións que o BNG considera de grande importancia: Incremento do número de traballadores/as do Servizo de Axuda a Domicilio (SAF), remodelación da Praza da Treixadura e o seu contorno, mellora integral do entorno e accesos á escola do Campo-Angustia e a cuberta da pista polideportiva da Granxa-Santa Cruz.

Rosana Pérez comunicoulles aos veciños e veciñas da Tomada que a Deputación subvencionará o arranxo da estrada principal da aldea

Tue, 06 Oct 2009 19:48:00 GMT

Xoves 1 de outubro do 2009.- A nosa portavoz municipal e deputada provincial, Rosana Pérez Fernández, desprazouse ata a Tomada para entrevistarse cos veciños e veciñas da zona e comunicarlles que a Deputación da Coruña aportará 12000 euros para o arranxo da pista da aldea, logo de que o BNG presentará sen éxito varias iniciativas no concello e anos despois de que a veciñanza comezase a reclamar esta actuación.

O BNG demanda nunha moción que SOGAMA manteña o servizo de recollida de residuos voluminosos

Tue, 29 Sep 2009 17:57:17 GMT

24 de setembro de 2009.- Esta moción que o BNG está a presentar en todos os concellos de Galiza, levouna ao pleno o concelleiro Xosé Lois Piñeiro. Logo de que SOGAMA decidise unilateralmente deixar de recoller os residuos voluminosos, nós reclamamos que se retracte e manteña este servizo en todos os municipios galegos.

O BNG presenta unha moción sobre o bono social relativo á tarifa eléctrica

Tue, 29 Sep 2009 17:58:47 GMT

24 de setembro do 2009.- O concelleiro Manel Casal presentou esta moción ao pleno da corporación. Nela solicita que o concello inste ao goberno do estado a ampliar este servizo a todos os usuarios-as e que se apliquen os prazos establecidos pola normativa.

Solicitamos o acondicionamento de varias pistas na parroquia do Xobre

Tue, 29 Sep 2009 17:59:33 GMT

24 de setembro do 2009.- O concellal Severino Romero presentou no pleno do mes de setembro esta moción, coa intención de que se incluiran no POS da Deputación Provincial da Coruña o arranxo de pistas nos seguintes lugares da parroquia do Xobre: Areos, Garita e Costa.

O BNG presentou catro mocións no pleno de setembro

Tue, 29 Sep 2009 18:00:31 GMT

24 de setembro do 2009.- O xoves 24 de setembro celebrouse o pleno da corporación municipal no concello da Pobra, o goberno do Partido Popular votou en contra, e polo tanto impediu a súa aprobación, de todas as moción presentadas pola oposición. Catro eran do BNG e referíanse todas elas a cuestións de grande interese para os veciños e veciñas da Pobra. O PP demostra unha vez máis un desprezo absoluto polas institucións públicas e pola democracia, entenden esta únicamente como un exercizo de sufraxio a realizar cada catro anos únicamente para concederlles o poder. Non comprenden o valor do debate e da exposición de ideas e polo tanto non son capaces de chegar a ningún tipo de acordo. Todo isto en contra dos intereses da cidadanía.

Unha vez máis o BNG reclama importantes melloras para a zona da Covecha

Tue, 28 Jul 2009 20:25:43 GMT

28 de xullo de 2009.- Hoxe o BNG presentou á prensa unha nova moción reclamando unha maior atención á zona da Covecha, concretamente á Rúa Tetuán. Ata alí desprazouse a portavoz municipal Rosana Pérez Fernández, acompañada polos concelleiros Xosé Manuel Casal e Xosé Lois Piñeiro. A moción debatirase no vindeiro pleno, o xoves 30 de xullo.

Constitución do novo consello comarcal do Barbanza

Tue, 07 Jul 2009 12:02:07 GMT

Ribeira, 6 de xullo de 2009.- Este luns constitueuse o novo consello comarcal, encabezado como responsábel comarcal pola compañeira Dores Torrado, concelleira na corporación de Boiro.

Os concelleiros do PP fan un escaso seguimento das obras do concello.

Tue, 28 Jul 2009 19:03:32 GMT

20 de xullo de 2009.- A concelleira Cristina Andrade ven de presentar un escrito no concello reclamando que os concelleiros do PP cumpran co seu cometido e fagan un seguimento das numerosas obras que se desenvolven no concello, minimizando as importantes molestias que veñen causando a todos os veciños e veciñas da Pobra e a todas as persoas que nos visitan nestas datas.