Novas BNG Comarca Baixo Miño

O BNG no Rosal solicitará a restitución de axudas aos concellos en materia de normalización lingüística

Mon, 19 Sep 2011 10:04:33 GMT

O BNG no Rosal solicitará que o Pleno inste á Xunta a restituír as axudas aos concellos en materia de normalización lingüística.
A iniciativa presentada hoxe polos nacionalistas no Rosal, xurde diante da recente decisión da Xunta de eliminar estas axudas mediante unha orde do pasado día 7 deste mes.
Segundo o voceiro nacionalista, Alberte Alonso Pereira, estas axudas víñanse concedendo anualmente desde hai moitos anos, e permitían que algúns concellos contasen con servizos de normalización lingüística, ou desenvolvesen actividades de promoción e dinamización do noso idioma.

O BNG alerta da falta de concreción do Goberno español no dragado do Ferry

Thu, 15 Sep 2011 15:30:13 GMT

O Bloque Nacionalista Galego alerta á sociedade guardesa da falta de concreción da solución provisional do dragado do río que está a anunciar o Alcalde da Guarda nos medios de comunicación.
Na comunicación recibida no Concello da Guarda de parte do Ministerio de Medio Ambiente fálase dun compromiso da Dirección Xeral de Sostenibilidade da Costa e do Mar para colaborar, xunto coas demais administracións, para acometer as actuacións necesarias para manter o servizo do ferry a curto prazo.
Para o BNG esta comunicación xera moitas dúbidas, dado que en ningún momento se fai mención a prazos de execución e a dotación orzamentaria necesarios para levar a cabo o dragado. O portavoz do BNG, Xan Lois Lomba, advertiu deste aspecto nunha reunión mantida no concello da Guarda e que coincide coa esixencia da Presidenta da Câmara Municipal de Caminha de que se lle comunique por escrito os prazos aproximados de execución das obras.

O BNG entrevístase coa Presidenta da Cámara de Caminha para tratar problemática do Ferri

Tue, 06 Sep 2011 17:19:50 GMT

Cando o pasado 26 de agosto o rexedor Guardés comunica á Cámara de Camiña que non se realizará un novo dragado do río apóiase nun informe ambiental segundo o cal sería preciso realizar un estudo de impacto ambiental antes de autorizar o novo dragado, estudo que se demoraría un ano en seren realizado. O que os nacionalistas consideran máis grave é que o mencionado estudo ten data de 16 de xuño... Segundo o BNG non ten xustificación algunha que sendo coñecedores dende xuño desta situación teñan ocultado durante todo o verán a realidade, sabían que a canle non será dragada e o servizo do Ferri non poderá continuar. O Alcalde da Guarda terá que explicarlle á poboación por qué non fixo pública esta información.

O BNG denuncia erros no cobro dos impostos municipais do Rosal que lle causan prexuízos aos veciños

Sun, 04 Sep 2011 15:37:13 GMT

O BNG Rosal ven de presentar no Rosal unha proposta no rexistro de entrada do concello, na que solicita “maior rigor na xestión e cobro dos recibos de impostos municipais”, co fin de evitar os prexuízos que se lle causa a veciñanza.

Segundo os nacionalistas, no último mes de agosto, “foron varios os veciños que se puxeron en contacto con nós, e tamén temos visto varios escritos no rexistro de entrada, denunciando a duplicidade e erros nos obxectos tributarios de recibos xestionados por unha empresa privada e polo catastro que despois cobra a ORAL”.

O BNG responsabiliza ao Goberno español e ao Alcalde da Guarda da actual situación do ferry

Sun, 04 Sep 2011 15:33:38 GMT

Ante as preocupantes noticias que aparecen en distintos medios de comunicación sobre a suspresión do servizo de ferry entre A Guarda – Caminha, o Bloque Nacionalista Galego considera que existe unha responsabilidade directa por parte do Alcalde da Guarda e do Goberno español do PSOE.
O BNG leva denunciando e advertindo dende hai tempo esta situación e da falta de implicación das distintas administracións tanto local, autonómica como estatal.
O BNG presentou en febreiro do ano 2010 unha moción na que se solicitaba un compromiso firme e público do Goberno español coa continuidade do ferry A Guarda-Caminha. Asemade, solicitábase que se realizaran os estudos pertinentes para a realización dun dragado que faga compatíbel o transporte e a actividade pesqueira no río Miño.

O BNG agradece o apoio da veciñanza de Oia no pleno do movemento 26A: operación 7 tazas.

Sun, 04 Sep 2011 15:29:53 GMT

A orde do día do pleno só incluía como asunto relevante a aprobación dos festivos locais de Oia para o ano 2012, pero tiña como aliciente a convocatoria feita por Miguel Giráldez, concelleiro do BNG, da operación “7 tazas”, para que a veciñanza acudise o salón de plenos con cámaras en resposta o incidente do último pleno no que o alcalde tentou impedir a gravación.
O pleno comezou coa aprobación da acta da sesión anterior, punto que Miguel Giráldez aproveitou para espetarlle o alcalde “ que nos próximos 4 anos o BNG ten pensado facer unha labor social, facendo que o alcalde se comporte de xeito respectuoso e democrático coa oposición”.

O BNG denuncia a limpeza irresponsable da Muralla Medieval por parte do Concello de Tui

Sun, 04 Sep 2011 15:25:59 GMT

O BNG denuncia a pouca responsabilidade do grupo de goberno do PP de Tui, posto que diante do abandono e mala imaxe que levan anos ofrecendo os muros que dan ´paseo marítimo e a propia muralla medieval, destacando o baluarte coñecido como a Punta do Demo, agora os responsables municipais deciden acometer obras de desbroce e limpeza sen ter solicitado permiso á Dirección Xeral de Patrimonio da Xunta, polo que a propia institución municipal dá outro exemplo máis de como non se deben face-las cousas e para maior colmo e sonroxo da poboación, unha institución pública limpa propiedades privadas con diñeiro público, cuestión que pode ser constitutiva de delito por parte dos responsables.

O BNG solicitará no próximo pleno do Rosal, instar o goberno galego a retirar a orde que eleva o valor de bens inmobles nun 30%

Sun, 04 Sep 2011 15:22:29 GMT

O BNG ven de presentar no rexistro do concello do Rosal, unha proposta na que solicitan instar ao goberno galego á retirada da orde que aprobou a Xunta este mes de agosto e que eleva o valor de bens inmobles nun 30%.

Segundo explica o voceiro nacionalista, Alberte Alonso Pereira, a Xunta de Galiza publicou no DOG do 19 de agosto de 2011, a Orde da Consellaría de Facenda do 28 de xullo de 2011, pola que se aproban os prezos medios no mercado de determinados inmóbeis rústicos e urbanos situados na Comunidade Autónoma de Galiza para os exercicios 2010 e 2011. Os valores medios fixados para os bens inmóbeis nesa norma supoñen un incremento considerábel respecto do valor que se viña asignando polos propios servizos tributarios da Xunta de Galiza.

O BNG solicitou no Rosal que se limiten as comisións bancarias para evitar “cobros abusivos”

Sun, 04 Sep 2011 15:19:59 GMT

O grupo municipal do BNG solicitou, no último pleno celebrado no Rosal, instar á Xunta para que se limiten as comisións bancarias e se poña fin aos “cobros abusivos” que se producen na actualidade.

Nun primeiro termo, o BNG solicita ao goberno galego que, á súa vez, inste ao do Estado a impedir que “nesta situación de crise se produzan aumentos nas comisións que cobran as entidades financeiras”.

Por outra banda, para o BNG, é necesario realizar “unha supervisión das comisións bancarias estabelecendo límites máximos en función de parámetros obxectivos que teñan en conta o custe real dos servizos prestados”.

Tamén sería necesario obrigar nesta situación ás entidades bancarias a que “ofrezan de forma transparente as comisións que cobran polos distintos servizos prestados”.

Finalmente, sería necesario aprobar de forma inmediata as normas legais precisas para “evitar que por parte das entidades financeiras se manteña o cobro abusivo en concepto de mantemento ou administración de contas correntes ou de aforro e obrigar á devolución das cantidades ingresadas en canto de persistir esta práctica”.

O BNG no Rosal esixe que executen as obras para elevar os pasos de peóns da zona urbana

Sun, 04 Sep 2011 15:17:19 GMT

O pasado pleno celebrado o día 30 de xullo, o BNG volveu preguntar polas obras de elevación dos pasos de peóns na zona urbana. Segundo o voceiro nacionalista, Alberte Alonso Pereira, a resposta do alcalde foi que se 'realizaran antes de finais de ano' e asegurou que “esa xa foi a resposta que deron o ano pasado”.

Alonso Pereira manifestou que en marzo do ano pasado foi anunciado, por parte dun cargo da Xunta nunha visita ao Rosal, que se realizarían esas obras antes de finais de 2010. “A realidade é que a día de hoxe seguimos igual. As obras sen facer” enfatizan os nacionalistas.

O BNG no Rosal solicita que se laven periodicamente os contedores de lixo

Sun, 04 Sep 2011 15:14:08 GMT

O BNG no Rosal ven de solicitar que por parte do concello se proceda ao lavado dos contedores de lixo verde.
Esta petición do BNG está motivada polas queixas que recibiron de veciños, sobre o mal cheiro que desprenden algúns contedores de lixo verde (os de materia orgánica), segundo manifesta o voceiro nacionalista, Alberte Alonso Pereira.

O BNG en Oia chama áveciñanza a defender a sanidade pública no municipio

Mon, 08 Aug 2011 18:32:26 GMT

O BNG de Oia considera de extrema gravidade a redución de facultativos no seu Centro de Saúde ao 50%, que supón unha notable perda na calidade do servizo que toda Oia debe rexeitar: veciñanza e institucións. Se antes as citas eran outorgadas para 1 ou 2 días despois de seren pedidas, na actualidade xa se están a dar casos de atrasos de 9 días.
En palabras do concelleiro nacionalista, Miguel Giráldez, “se non reaccionamos perante estes primeiros avisos, a cousa pode ir a moito peor. Teñamos en conta que a sanidade é un servizo absolutamente básico, recoñecido mesmo na Declaración Universal dos Dereitos Humanos”.

O Goberno do PSOE rexeita a moción do BNG para a realización dun Plan de tráfico para A Guarda

Mon, 08 Aug 2011 18:36:19 GMT

O pasado venres 29 de xullo, o pleno do concello discutiu unha moción presentada polo BNG para a creación dun Plan de tráfico para a Guarda. A moción foi rexeitada polo Alcalde, X.M. Freitas, o seu grupo de goberno e coa abstención de Converxencia Galega.
Segundo os nacionalistas, A Guarda é un concello cunha importante actividade comercial e de ocio dentro da comarca, así como un referente turístico de primeira magnitude. Esta condición fai que se evidencien a diario problemas de tráfico que chegan a colapsar, en momentos puntuais, algunhas rúas da nosa vila. Estes problemas son máis patentes coa chegada da época estival, o que fai necesario, máis ca nunca, unha planificación do tráfico no noso concello.

O BNG cualifica de 'pouco oportuno' o momento elixido para cambiar as balizas da praia de Eiras

Mon, 08 Aug 2011 18:27:25 GMT

O Bloque Nacionalista Galego non cree que o verán sexa o mellor momento para pórse a cambiar as balizas que sinalizan a zona de baño na praia de Eiras. Cualifican de 'pouco oportuno' o momento elixido e sinalan que se debería ter feito antes.
Aínda que entenden que é normal ter que cambiar as balizas se se atopan en mal estado, -tal e como asegurou o alcalde no pasado pleno-, consideran que se debería ter feito antes e non na tempada de baño.

Comunicado de prensa do BNG sobre o pleno ordinario de xullo

Mon, 08 Aug 2011 18:25:37 GMT

No pleno do pasado día 29 de xullo, o BNG mantivo a súa posición con respecto aos soldos do grupo de goberno no concello da Guarda. Unha postura firme e coherente que contrasta coa sorprendente abstención de Converxencia Galega. Sorprende tamén o seu posicionamento errático, en apenas vinte días pasaron de poñer enriba da mesa a proposta máis restritiva, 85.000 €, a dar por boa a proposta do PSOE, 114.000 €.

Para o BNG resulta incomprensíbel, mesmo preocupante, que un grupo político vote en contra e logo se absteña coa mesma proposta en tan curto espazo de tempo. O que xa chega a resultar traxicómico é que tenten xustificar esta viraxe, non con argumentos, se non con ataques ao Bloque Nacionalista Galego. É tal a deriva de Converxencia Galega, que nas cifras que presentan sobre os soldos dos Alcaldes e Alcaldesas da comarca, os do BNG son os que menos cobran. Esta formación política segue, agora, os argumentos do PSOE ao pé da letra, por que non o fixeron hai 15 días? Que mudou?

O BNG no Rosal solicita que se garanta a seguridade nun paso de peóns en Tabagón

Thu, 28 Jul 2011 09:31:30 GMT

O voceiro nacionalista, Alberte Alonso Pereira, indica que esta perigosidade xa se puxo de manifesto en numerosas ocasións, pola falta de respecto á sinalización e límites de velocidade dos vehículos que por esa estrada transitan. De feito, engade, xa se teñen rexistrado varios accidentes de circulación, afortunadamente, sen graves consecuencias para as persoas.
O BNG proponlle ao pleno, que se dirixa á administración titular da estrada, co fin de que se adopten as medidas necesarias para garantir a seguridade para as persoas no paso de peóns en cuestión.

O BNG mantén que algúns adegueiros, produtores e hosteleiros non participan na Feira do Viño do Rosal polos custes que lles supón

Tue, 26 Jul 2011 16:54:27 GMT

Lamentan que se utilicen impostos dos veciños e veciñas do Rosal en financiar a participación de hosteleiros doutros concellos
BNG tamén traballa para que ano tras ano a Feira do Viño mellore, afirma Alberte Alonso Pereira
O BNG do Rosal mantén que algúns adegueiros, produtores e hosteleiros do concello, non participan na Feira do Viño polos custes que lles supón.
Nese sentido recoméndanlle ao goberno municipal e ao alcalde que se informen directamente e falen máis cos interesados para facerse unha idea obxectiva dos motivos da non participación. Segundo indica o voceiro municipal do BNG, Alberte Alonso Pereira, as manifestacións do seu grupo son froito de conversas directas cos implicados e non 'consideracións súas', como fai o alcalde na súa resposta.
"Tres adegas -excluída a que xa non pertence á subzona do Rosal-, productores e hosteleiros que participaron en anos anteriores, non estiveron este ano na Feira do Viño. Ese é un dato obxectivo", afirman os nacionalistas.

O alcalde de Oia intentou impedir a gravación do pleno extraordinario no que se aprobaron os salarios do goberno municipal

Wed, 20 Jul 2011 18:13:13 GMT

Miguel Giráldez, concelleiro do BNG, desde que tomou posesión no cargo ten como habito gravar en vídeo as sesións do pleno da corporación para logo difundilas a tráves de youtube, das redes sociais e tamén no seu blog (miguelgiraldez.info). O feito que motiva estas grabacións é que o goberno do PP non quere os veciños e veciñas, que así o desexen, poidan asistir ós plenos da corporación. O formula que utiliza o PP para limitar a participación cidadán nos órganos municipais son os horarios totalmente incompatibles para a maioría dos traballadores e traballadoras.
A intención do BNG é fomentar a participación cidadán, tendo como obriga o compromiso de achegar a veciñanza toda a información do que sucede nos plenos da corporación. Para iso Miguel Giráldez como membro da corporación, apóianse na lei Lei 7/1985, que no artigo 69 dí "as Corporacións locais facilitarán a máis ampla información sobre a súa actividade e a participación de todos os cidadáns na vida local" e no artigo 70 dí que "as sesións do Pleno das corporacións locais son públicas" e polo tanto susceptibles de gravadas e difundidas nos medios de comunicación que se consideren oportunos.

O BNG denuncia os cortes no servizo ADSL no Rosal e os prexuízos económicos que causan

Wed, 20 Jul 2011 17:34:10 GMT

O Bloque Nacionalista Galego, a través dun escrito presentado no rexistro de entrada do concello, ven de denunciar os cortes no servizo ADSL no Rosal no mes de xullo.
Segundo o referido escrito, o BNG di que no presente mes de xullo e en diferentes días, o servizo ADSL de MOVISTAR sufriu cortes de varias horas, sobre todo pola mañá. Indican que os prexuízos que implica para os usuarios do mesmo son evidentes e subliñan que ademais causa prexuízos económicos para as empresas, para a propia administración e para as persoas que dependen de realizar trámites diante da administración. A empresa xustifica os cortes por avarías xerais, segundo conversas coa empresa do voceiro nacionalista, Alberte Alonso Pereira.

O BNG considera que a Feira do Viño do Rosal necesita dun novo impulso e cambio de rumbo

Tue, 19 Jul 2011 11:51:30 GMT

O BNG considera que a Feira do Viño do Rosal necesita dun novo impulso e dun cambio de rumbo para que non esmoreza.
“Ano tras ano van a menos as adegas e os expositores que participan na mesma”, aseguran.

O voceiro nacionalista no concello, Alberte Alonso Pereira, indica que nos últimos anos as adegas máis modestas están deixando de participar, así como algún produtor de froita fresca. Para os nacionalistas este feito obxectivo está motivado polos custes que lle supón participar na feira, que son inasumíbeis. Ademais do prezo que cobra o concello polo stand e pola ocupación de vía pública, teñen que asumir gastos de electricidade, seguro de responsabilidade civil, ... o que fai moi cara a participación.