Quintana esixirá que as demais forzas políticas se pronuncien sobre o Estatuto de Nación antes das eleccións galegas
Quintana saúda tras o discurso
Santiago de Compostela, 5 Outubro 08.- Anxo Quintana, tras ser proclamado candidato á presidencia da Xunta por máis do 95% dos votos, reivindicou no seu discurso ante a militancia que todas as forzas políticas que se presenten ás eleccións galegas aclaren se están dispostas a apoiar un Estatuto de Nación. “Necesitamos un Estatuto de Nación, para que Galiza exista e para que non quede atrás”, asegurou. “Os galegos e as galegas teñen dereito a saber se todos os partidos están dispostos a que o país teña un Estatuto de primeira”, segundo Quintana.
"Traballarei até a última pinga de suor para ser un digno representante da mellor xente de Galiza"O portavoz nacional e candidato á presidencia da Xunta deu as grazas e parabenizou aos asistentes pola “confianza que depositades en min” e comprometeuse a traballar “até a última pinga de suor para ser un digno representante da mellor xente de Galiza”.
Un momento da intervención do candidato nacionalista
Respecto por Galiza
"Non quero gobernos amigos nin inimigos; quero gobernos que respecten a Galiza como nación"O portavoz nacional destacou que “os galegos non queren guerras nin submisións”. Nesa liña, afirmou: “eu non quero gobernos amigos nin inimigos; quero gobernos que respecten a Galiza como nación” e comprometeuse a esixir do Estado un diálogo bilateral coa nosa administración.
Maioría social galeguista
Quintana asegurou que o BNG actúa en política “coa sabiduría do pobo”, e por iso “cada vez hai máis xente que mira cara a nós”. Así, dirixiuse “a todos os que desde distintas posicións levan a Galiza no corazón” para que “entre todos xuntos construamos un país de liberdade e orgulloso da súa identidade”.
Concurso eólico como exemplo de democracia
O actual vicepresidente da Xunta puxo en valor a aposta do goberno galego por internacionalizar a nosa cultura, revitalizar o medio rural, facilitar o acceso á vivenda e mellorar os servizos sociais. En definitiva, empregar os recursos do autogoberno para limitar os efectos da crise e “xerar benestar para os cidadáns”, unha idea na que “cada vez acreditan máis persoas”.
"As decisións relativas a Galiza tómanse nos órganos escollidos polos cidadáns e non no Consello de Administración dunha multinacional"Destacou tamén o proceso de concesión de licencias para os parques eólicos: “As cuestións relativas a Galiza, por primeira vez na Historia, estanse a decidir en órganos escollidos polos cidadáns, e non no consello de administración dunha multinacional que non ten nada que ver con nós”, asegurou. “Iso é democracia, o poder do pobo, aínda que a algúns parece que lles molesta”.
Así mesmo, sinalou, a través dunha anécdota, o elevadísimo grao de aceptación que está a ter o modelo educativo das galescolas, pola súa profesionalidade, e tamén pola escolla do idioma galego como lingua veicular.
“O mellor resultado da historia do BNG”
Anxo Quintana rematou o seu discurso expresando a súa convicción de que o BNG terá “o mellor resultado da súa historia” nas próximas eleccións ao Parlamento Galego.
