O portavoz nacional di que o Estado "se queda moi curto" na súa oferta de financiamento
Santiago de Compostela, 12 Xullo 09. O portavoz nacional do BNG, Guillerme Vázquez, critica “a inconcreción” da vicepresidenta do Goberno, Elena Salgado, na súa comparecencia de hoxe para dar conta do borrador do novo sistema de financiamento autonómico.
“Non é de recibo que a estas alturas non se comunique con exactitude con que fondos vai contar Galiza no novo sistema nen se imos ter ou non blindaxe para que eses fondos non decrezan co tempo”, valora o portavoz nacional do BNG.
“Se avaliamos as cifras que teñen trascendido, podemos dicir que o Goberno do Estado se queda moi curto e non dá satisfacción ás necesidades galegas”, acrecenta o líder nacionalista. Para Guillerme Vázquez, o ponto de partida do Estado -pór sobre a mesa 11.000 millóns de euros máis- é “francamente insuficiente”. “Desde o principio dixemos que a cantidade mínima apartir da cal se podería enfrentar este asunto sería 15.000 millóns de euros para o conxunto das comunidades autónomas”, engadiu.
O Goberno do Estado preocúpase non de mellorar o financiamento, senón de resolver os problemas políticos do PSOEEnfatizou que Galiza só poderá manter a súa “posición relativa” se accede ao 7,8 por cento dos recursos totais do sistema. “Todo o que sexa por debaixo desta cifra é inasumíbel”, afirmou.
“Desde o principio, acrecentou, no BNG tivemos a impresión de que o Goberno do Estado enfrentou esta negociación non para mellorar o financiamento autonómico, senón para resolver os problemas políticos propios do PSOE e esa impresión non fixo máis que confirmarse co paso do tempo”, concluíu.
