"Nen Rajoy nen Blanco nen Fernández Ordóñez son os que teñen que decidir o futuro das caixas galegas"
Santiago de Compostela, 20 Novembro 09. O portavoz nacional do BNG, Guillerme Vázquez, afirmou esta mañá en rolda de imprensa que “nen Rajoy nen José Blanco nen Miguel Ángel Fernández Ordóñez son os que teñen que decidir o futuro das caixas galegas”. E engadiu: “Téñeno que decidir a sociedade galega e os poderes democráticos que a representan”.
O líder nacionalista pronunciouse nestes termos durante a rolda de imprensa que ofereceu conxuntamente co dirixente da CIG Anxo Louzao e após o encontro que ambos mantiveron coas presidentas dos comités de empresa das oficinas de Igualdade e Benestar das provincias de A Coruña e Pontevedra.
Interpelado polos xornalistas a este respecto, o portavoz nacional expresou o “agradecimento” ao presidente da Xunta pola “prontitude” coa que respostou “e de maneira satisfactoria” á demanda do BNG -vehiculizada através dunha carta que se enviou o luns- de que se convocase unha reunión dos tres líderes galegos.
Agarda o líder nacionalista que a reunión -que se celebrará o vindeiro mércores no Parlamento Galego apartir das 12.00 horas- sirva, en todo caso, para “avanzar nunha posición de País arredor do principio de que o centro de decisión das caixas fique en Galiza”. “Non serviría de nada reunirse para expresar que aquí non hai nada que facer, ou para emitir unha queixa sobre as dificultades do asunto”, engadiu.
"Os executivos das caixas teñen que dicir, pero non que decidir. Os que deben decidir son os poderes democráticos que representan a sociedade galega"Avanzou que na reunión dos tres líderes “expresaremos o noso criterio, xa ben coñecido e moi claro, de que as caixas deben continuar a ser galegas e deben porse ao servizo da economía produtiva do País”. “A nosa posición é ben coñecida. A de algún outro, non tanto. E desde logo o presidente da Xunta fará ben en explicitar a súa”, asegurou.
Esclareceu que Feijóo terá “todo o noso apoio” para “garantir que o centro de decisión das caixas fique en Galiza”, pero “evidentemente non contará con nós se é simplesmente para renderse ou para dicir que aquí non hai nada que facer”.
Chamou ao consenso para construír unha “posición de País” e nesa dirección afirmou que sería “unha mostra de boa vontade e da decisión de avanzarmos con rapidez na boa dirección” que o Partido Popular apoiase a toma en consideración o próximo martes da proposición do BNG para a reforma da Lei de Caixas.
O CONSENSO PASA POLA TOMA EN CONSIDERACIÓN DA PROPOSICIÓN DE LEI DAS CAIXAS
Neste sentido, o líder nacionalista enfatizou que non se trata de que “a nosa proposta vaia ser a futura lei de caixas”, senón de que “se apoie a súa toma en consideración para que comecemos o debate”. A proposición nacionalista é unha “base para empezar a discutir”. “Hai unha proposición de lei sobre a mesa. É a nosa. Non hai outra. O lóxico é asumila como un punto de partida, se realmente é certo que todos estamos na mesma perspectiva de garantir a galeguidade das caixas e de reforzar a capacidade de intervención dos poderes democráticos galegos”.
Inquerido sobre a reunión que van celebrar este luns o presidente da Xunta cos directivos das caixas, manifestou que “os executivos das caixas teñen que dicir sobre este asunto, pero non que decidir. Os que teñen que decidir é a sociedade galega e os poderes democráticos que a representan”.
MOBILIZACIÓN SOCIAL
Por último, o portavoz nacional anunciou que o BNG está disposto “a favorecer todas as mobilizacións sociais que sexan posíbeis para defender o País de calquera presión externa”.
“O que nos xogamos é tan vital como que os nosos aforros non sirvan para financiar o desenvolvimento doutros territorios”, engadiu.
