O BNG pide unha selección galega "xa" que poda competir oficialmente en torneos internacionais

Santiago de Compostela, 28 Decembro 09. O Bloque Nacionalista Galego celebrou esta mañá un acto reivindicativo das seleccións deportivas nacionais galegas e, por boca do seu portavoz nacional, mostrouse favorábel a que Galiza poda competir “oficialmente” en torneos internacionais.

A Praza do Obradoiro -baixo unha intensa chuvia, “hoxe estamos aquí os que nos mollamos por Galiza”, dixo Guillerme Vázquez- foi o escenario deste acto. Militantes, simpatizantes e dirixentes do BNG -unha moi ampla representación do grupo parlamentar e da Executiva Nacional- despregaron unha camisola da selección de grandes proporcións que locía a lenda “Selección Galega”. Tomaron a palabra os ex directores xerais de Deportes Santiago Domínguez e Marta Souto e o líder do Bloque Nacionalista Galego.

Guillerme Vázquez, durante a súa intervención

"Non ten futuro a política estremista, negadora do País, do Partido Popular"Após a leitura dun manifesto por parte de Santiago Domínguez e Marta Souto (achégase copia), o portavoz nacional dirixiu a palabra ás e aos asistentes para afirmar con toda clareza que “o apoio á selección galega” é “un clamor social” e que “a sa identificación da sociedade galega co seu país é unha realidade que ninguén vai poder eliminar”.

“O Bloque Nacionalista Galego”, engadiu, “fai tamén parte dese clamor social”. Na súa opinión, non é a política “en xeralización abstracta” a que inviabiliza a celebración de novos encontros da selección galega, senón “o goberno e a política do Partido Popular”.

Fernando Blanco Parga, Teresa Táboas, Tereixa Paz e Carme Adán

O líder do BNG reclamou con enerxía á Xunta de Galiza “que organice un partido da seleción nos vindeiros meses” e que avance “no recoñecimento institucional preciso para poderen competir oficialmente nos torneos internacionais”. “Non queremos pasos atrás. Non asumimos que se expulsen do ámbito oficial as seleccións deportivas galegas”, enfatizou.

O FEITO DESDE O GOBERNO

Alfredo Suárez Canal, Fernando Blanco e Carlos Aymerich

 

Puxo en valor o feito de o nacionalismo, desde o Goberno galego, ter impulsado e dado carta de natureza ás seleccións nacionais quer de fútbol quer doutras disciplinas deportivas, o que tivo como resposta a presenza de “milleiros de espectadores e espectadoras de todas as idades que desafiaron o frío en anos sucesivos nos campos galegos”.

A camisola da selección galega despregada sobre a pedra da praza

“Pensabamos todos os 'bos e xenerosos' deste país que era bon ter un equipo de todos os galegos, sen rivalidade entre nós, onde todos e todas nos vísemos reflectidos. Pois non. Había 'imbélices e escuros' que non nos entendían”, dixo o portavoz nacional en clara alusión pondaliana ao PP de Feijóo.

Foi alén nesta mesma dirección ao engadir que “nós non vemos o problema de que todos os galegos e galegas nos identifiquemos con símbolos comúns” e ao afirmar a súa convicción de que “non ten futuro esta política estremista, negadora do noso País, da nova clase dirixente do PP”. Onde ficaron, ironizou, “os teóricos da autoidentificación no PP?”.

Guillerme Vázquez, flanqueado por Marta Souto e Santiago Domínguez

Emprazou directamente ao presidente da Xunta e “aos señores do PP” a que “non lle teñan medo a Galiza” e a que “non trasladen os seus complexos de inferioridade ao Goberno da Xunta”.

O líder do BNG rematou o seu discurso apelando á autoestima de sermos galegos e galegas e a de non permitirmos “pasos atrás”. “Que a historia siga avanzando. Seleccións oficiais galegas, xa!”.

twitter  facebook  meneame  meneame 
[Imprimir]  |  [Enviar e-mail]

Arquivos para descargar


  • Manifesto a prol das seleccións nacionais galegas
  • Intervención do portavoz nacional no acto a prol das seleccións nacionais galegas
    • << voltar