Visita institucional dunha delegación da Executiva á Real Academia Galega

Francisco Jorquera, Carlos Aymerich, Guillerme Vázquez, Ana Pontón e Xosé Luís Méndez Ferrín

A Coruña, 12 Marzo 10. Unha delegación da Executiva Nacional do BNG encabezada polo seu portavoz nacional mantivo esta mañá un encontro institucional na sede coruñesa da Real Academia Galega co seu presidente, Xosé Luís Méndez Ferrín, e distintos membros da súa directiva.

Alén de Guillerme Vázquez, facían parte da delegación da Executiva o portavoz do grupo parlamentar, Carlos Aymerich; a responsábel de Cultura do grupo parlamentar, Ana Pontón; e o portavoz nacionalista no Congreso, Francisco Jorquera.

“A solución é retirar o decretazo, non dulcificalo cunha versión cosmética” pero igualmente reductora da presenza do galegoO BNG comunicoulle a Méndez Ferrín que está a impulsar distintas iniciativas para garantir un financiamento digno á Real Academia Galega.

"HAI QUE POTENCIAR O PAPEL DA RAG"

O BNG comunicou á RAG que impulsará iniciativas para garantir un financiamento digno á institución

“A RAG é unha institución moi importante para Galiza. Hai que potenciar o seu papel. As demandas de mellora do seu financiamento parécennos absolutamente razoábeis. O BNG vai desenvolver iniciativas parlamentares para satisfacelas na medida das nosas posibilidades. Estamos ante unha entidade fundamental para a defensa da nosa lingua e da nosa cultura”, declarou Guillerme Vázquez ás xornalistas e aos xornalistas que se achegaron á coruñesa Rúa Tabernas para cubrir este encontro institucional.

Inquerido a respecto das hipotéticas mudanzas que o Goberno Feijóo vai introducir no rascuño do decreto que regula o uso do galego no ensino non universitario, o líder do BNG foi especialmente tallante.

“Coñecemos esas hipotéticas mudanzas polas informacións de imprensa. O decreto actualmente en vigor (o aprobado polo bipartito) non está a crear nengún problema no ensino e contou no seu momento co apoio de todos, incluído o PP. Foi o PP quen rachou o consenso por razóns exclusivamente electoralistas”, comezou por dicir o portavoz nacional.

“CONTESTACIÓN ABSOLUTA DE TODA A SOCIEDADE GALEGA”

Rachado o consenso, o PP elaborou desde o Goberno un rascuño de decreto que se atopou “coa contestación absoluta de toda a sociedade galega”.

Feijóo, “que sempre presume de ouvir a sociedade”, o que debería facer agora sería “oila”, e, portanto, dar marcha atrás.

“A solución é retirar o decreto, non dulcificalo, coa intención de facer o mesmo pero cunha outra aparencia cosmética”, dixo, e por “facer o mesmo” se refería claramente a reducir a presenza do galego nas urnas.

“Que se retire o decretazo e que continúe en vigor a norma aprobada polo bipartito que, como se ve, se está a aplicar este curso con total normalidade e sen causar nengún problema nen no ensino nen na sociedade”, concluiu.

facebook  twitter  digg  technorati  yahoo  meneame 
[Imprimir]  |  [Enviar e-mail]
<< voltar